حصلت معايا وكنت هنفجر...

سلام عليكم يا شباب

مرة كنت فى المترو وقاعد تمام التمام لقيت شاب راح قاعد جنبي وبعد شوية لقيته راح مطلع الموبيل وفضل يلعب فيه شوية وبعدها راح داخل على الاغاني وبدأ الدي جي بتاعه باعلى حسه . اغانى من اغانى المساطيل زي سيجارة بنى والاستاذ والتلميذ وطبعا الواحد استحمل اغنية والتانية وبعد كده مقدرتش.اعصابي مش هتجيب معايا اكتر من كده
فرحت قايل له : غيرها
الشاب : هيا ايه دي
انا : الاغنية دي
الشاب : ليه يعنى
انا : مش عجباني الصراحة
الشاب : وانت مالك هو تليفونك انا حر
أنا : لأ مش حر مادام انت خلتنا نسمع بالعافية يبقى نختار اللى عاوزينه برضه

ورحت قايل للناس اللى قدامى , عجباكم الاغنية دي يا رجالة . فالناس راح قايلة لأ برضه غيرها يا كابتن

فقلت له شفت ولا حتى الناس عجباها البطاطس اللى مشغله ده
الواد راح باصص لي كده بذهول وراح باصص للناس وراح موقف الاغنية ومتكلمش ولا كلمة وبعد 3 محطات راح نازل بس فعلا كان محروق دمه اوي يعنى لو جبت عود كبريت جنب دماغه هيولع . وبعد ما نزل لقيت الراجل اللى قدامى راح قايل لى انت اول واحد اشوفه يعمل الحوار ده مع واحد من الناس دي وكمان ايه ينجح مع العالم الرزلة دي.

بصراحة انا بستغرب لما بشوف العالم دول كأنهم عايشين لوحدهم فى الدنيا وطظ فى اي واحد قاعد جنبه
دا حتى الموضوع ده بقا فى الجامعة كمان وفى المدارس. خلاص يعنى الواد هيموت لو مش هيسمع اغاني الكام ساعة اللى بره بيته.

بصراحة انا بسافر بره كتير عمري ما شفت افتكاسات زي كده الا فى بلدنا

وبصراحة لو كل واحد فينا قدر يغير فى نفسه حاجة زي السلبية والأنانية اللى بقينا فيها اكيد اكيد البلد دي هتكون احلى بلد فى الدنيا