من الدار للأرض ومن الارض للدار

حمار اشتكى قاضى من ظلم صاحبه..
يا حضرة القاضى انا كنت طول عمرى صاحبه..
على الحلوه وعلى المره بصاحبه..
من الدار للأرض .. ومن الأرض للدار..
لا عمرى اشتكيت والتبن عندى بالقنطار..
قام صاحبى باع الأرض .. وباع معاه الدار..
وأختلفوا الأخوه على القسمة..
ده مش عاجبه وده عايز شويه كتار..
دخل بينهم شيطان..
وقتل الأخ أخوه..
ما هو الإنسان بطبعه غـــدار..
مسكوه وحاكموه وإنتهى وغــار..
وهو ده الإنسان عمره على أخوه ما غــار..
بيسخروا منى إكمنى حمار..
طب انا من هنا بعلنها دولة الحمير..
وأهلاً بأى حمار..
عمرك يا قاضى سمعت عن حمار قتل حمار..
او حمار غدر بحمار ولا فتن على حمــار..
او حمار جاب سيره حمــار..
طب عمرك شفت حمار يظلم حمار او ياكل حق حمــار..
صحيح الإنسان عنده عقل وفى النهاية انا حمــار..
بس هو بيهدم بعقله كل شىء جميل إنهــار..
بدل ما يزرع أخوة ومحبة خلى الدم للركب أنهــار..
يا بن ادم خدها حكمة من حمار ابن حمــار..
اعرف ربك تعرف نفسك لا تتعب ولا تحتــار..
إقنع وارضى بنصيبك واطلب الستر من الستــار..
افتكر بيتك وولادك غض بصرك وخاف الجبــار..
ارضى ربك يرضى عنك ويرضوا النــاس..
فهمت ولا اقول تانى!!