اشترى ياهان ....وادفع يابية

السلام عليكم



رأيت الناس بتتمشي و تتغدّي و تتعشّي ... في شوارع مصر

مطاعم فول و طعمية و هامبرجر و بيتزا هت

و كنتاكي علي شاورمة

و طلياني و أسباني و كُشري بلدي غالي يا ولدي ... في شوارع مصر

و رأيت الناس راكبينها

دي الماني و دي ياباني

و دي من أمريكا جايبنها

لزوم العَظَمه سايقينها ... في شوارع مصر

محلّات شيك و دكاكينها نيون بيبرق و بينوّر

ده سوبر ماركت و ده مول و دي شركات مليانه كل ما تتصور

و ده كشك سجاير و ده بياع داير علي رزقه بيدوّر

و ده شحات و دي بياعة مناديل وراها عيال بتعيط

إشتري يا هانم و إدفع يا بيه خلي الأمور تتظبط

و أهي عالم بتسترزق تشق الصخر يتشقق ... في شوارع مصر

و عمارة عالية و إيجارة غالية

و ناس ألَاجة تشرب المية

في قزازة صافية جايه من برّه ... لشوارع مصر

و أكوام زباله علي كل ناصيه قالوا نضافه و هي لكل مَرَض جمّاعه

و طوب و تراب في الشارع و دي حفرة و دي فاتحينها بلاعة

و حواجز متارس بعرض الشارع و سمّوها مطبّات صناعي

و سوق يا سطي علي مهلك ما هو التخطيط مالوش داعي

و عا البيعَة طينة مطره و مواسير طافحة و مجاري... في شوارع مصر

و ناس في الهوجه بتعدي

أتومبيل آزح ما يهدي

و ناس غلبانه تتشعبط و تتنطط

ما لهاش قيمه و لا ديه ... في شوارع مصر

و ناس عايشه بملاينها

في أبراج عا النيل بتتفرج

علي كباري فوق المية ... و فوق شوارع مصر

و تحت الكوبري ناس نايمه

لا ليها دعوة بالزحمه

و لا بالفول و لا اللحمة

تقوم بالليل و بتفتش علي عيشها

و بتلقط من زبالة ... شوارع مصر

قطط جربانه مايضرش

كلاب سعرانه ما يهمش

عيال عريانه تتخلّف و بتخلّف

و طول دُنيتها ما تعرف غير ... شوارع مصر

و طوابير واقفه علي طابونه

بتتخانق و بتزاحم

علي رغيف عيش بمساميره

و صراصيره اللي بقت ماليه ... شوارع مصر

و مرور معطل و أتوبيس مبطل

و الحركه واقفه و الزفه زايطه

و سرينه عاليه و ظابط مرابط

دا البيه معدي ... في شوارع مصر

شاخت بهيه وراح شبابها و ضاع جمالها

و لا حد حاسس من عيالها

بناتها تاهت في حجابها لا هي عايقه و لا هي حشمه

و شبابها هاجج من ترابها لا شغله دايمه و لا لاقي لقمه

و اللي قاعد عا الأهاوي عمال يبحلق في خلق رايحة و خلق جايه

و لا حد فاهم إيه بيجري و ليه ده يحصل ... في شوارع مصر