اكيد بحبك ياحمااااار

اكيد بحبك ياحمار وبقولها وبأعلى صوتى




طالما الحمار بقى هو سندنا ودرعنا الاقتصادى وسلاحنا لتقوية صادرات بلدنا.. وتحيا مصر

كنت فى جلسة صفاء مع الجريدة (انا بحب اقرأالجرايد القديمه اوى) وقرأت خبراً سخسخنى مالضوحك(تاريخ الجريده كان مقطوع للاسف)
قال ايه الحمير المصرية بقت مطلب دولى وبالاخص يعنى.. صينى
سيبكو من حكاية الصين دى لانه اصبح من المتعارف عليه إنها راشقة حتى ف جحر النمل
وانا بقى ناوي احلل الخبر دا من منطلق اقتصادى واجتماعى وسياسى وتهييسى

من المنطلق الاقتصادى ايها الاخوة والاخوات
هذا الكائن الغلبان المغلوب على امره تخيلو .. تخيلو هيستخدموا جلده فإيه
ايه ايه
تصنيع شوزات وشنط؟......... نو
دواسات تتحط على عتبة البيوت ويكتبو عليها ويلكم ؟.............. نو
ناويين يعملوه رمز من رموز الكفاح المسلح؟........... احتمال بس نو برضو

قال ايه .. ولامؤاخذة يعنى.. هيعملو منه منشطات
واعتقد انهم بيعملو كدا عشان الكام ترليون صينى مش كفاية وعاوزيين ينتجو صنيين اكتر
لتوزيعهم على جميع دول القارات السبع
واكيد بعد نجاح الجنان دا احتمال الصين تصدر هذا العقار ويتم استبدال الفياجرا بال حماجرا
وفى نقطة كمان شديدة الاهمية.. اكتشاف عظيم لأهمية ألبان الحمير واللى الصينيين برضو بيبلبعوها لكثرة غناها بالبروطينات

ولحمها طبعا غذاء كامل الدسم.. دول بيقزقزو الصراصير ,, جت عالحمير يعنى؟
ومن المنطلق الاجتماعى.. للجانب الصينى برضو.. لمّا يزيد عدد السكان كدا مش هيضطروا للهجرة فى افراد..
الهجرة هنا هتكون فى جماعات.. يعنى كل صينى هيغادر ومعاه المدام والاولاد

وينزلو يستوطنوا البلد ويكوّنوا أقاليم صينية شعبية.. ويبقى اسمها جمهورية الصين المتشعبة

والجانب السياسى زى مانتو شايفين.. زى الفل يامعلمى طالما فيها تصدير يعنى عملة صعبة يعنى خير لينا كلنا
واعضاء مجلس الشعب بقى لامؤاخذة يعنى يخبطوا راسهم فى الحيط
هما صحيح يتسائلون اين تختفى اللحوم الحميرية بعد سلخها لكن مش دا المهم طبعااااا

وعلى الجانب الاقتصادى المصرى.. هناك استغلال كامل للحمار

- فعز شبابه يجر الكارو


- فى سن اليأس يندبح وياكلوه الاسود والديابه اللى فى الجونينة يا ولدى

- وبعد الدبح الجلود تهاجر الصين فى مهمة رسمية سامية

بس الموشكلز البسيط جدا .. من وجهة نظر المسئولين.. والكبير جدا.. من وجهة نظر جمعية الرأفة بالحمار
ان دا فيه تهديد للحمار بالانقراض.. يعنى خلاص هنفقد هذا الكائن الاغلب من الغلب اللى تبص فعنيه تلاقيها كلها طيبة وقهر وشكوى من ظلم البنى ادمين


ومش هنسمع تانى صوته العذب اللى بيفكرنا بأيام الزمن الجميل.. اخر الحناجر المحترمة.. عا


دا غير انهم اكتشفو ان الجلود اللى بتتصدر كتيرة جدا بالنسبة للحمير المذبوحة ظلما وعدوانا

يا ترى يا اهل ترى اين تختفى هذه الللحوم؟؟؟
.
سؤال من شدة صعوبته اجابته تاهت وبدور عليها(لو حد لاقها يجيبهالى وحياتكو)


اه على فكرة ساندوتش فاهيتا اللى باكله دا حلو اوى.. صينى صينى يعنى
وتلاقى نسيرة اللحمة فيه اطول من رغيف الفينو.. ناس كرما بصحيح

اوصيكم تاكلو فاهيتا هتعجبكم جد...هأ.... جد... هأ.... جدا
حااااأ حاااااااأ حااااااااااااااأ

ايه دا انا جرالى اييه.. اين ال 911 ؟
الحقونى بالداكتور

للاسف عندك حالة شوحار حااااد... ياريت ماتكالش لحم حميرى مش عليه ختم الوزارة بعد كدا


امال الواحد تعب وهو بيدور على صور الحمير دى ليه